ساعات كده بتجيلك صدمات ف حياتك ورا بعضها بتخليك تحس ان ندمان علي كل حاجة حلوه عملتها ف حياتك
تتصدم ف أقرب الناس ليك واحد ورا التاني وتكتشف ان اكتر ناس تعبت نفسك علشانهم طلعوا ميستاهلوش
من كتر مانت مش مستوعب بتجيلك حالة من الصمت وتحس للحظة انك نفسك تعتزل الناس كلها
نفسك تصرخ وتطلع كل اللي جواك من غير ماحد يلومك او يحاسبك
لكن للأسف حتي الأمنية دي محدش بيسيبك تحققها
دموعك بتضطر تخبيها عشان محدش يشوفها فيجرحك بزيادة لانه مقدرش يفهمك أو يحس بيك
فبتعمل حاجة من الاتنين
ياما بتكتم جواك وتسكت وتتعايش وتفضل طول الوقت هربان من نفسك
ياما بتدخل ف حالة احباط تفضل تلوم فيها علي ربنا وتقوله اشمعني انا يارب
أو تظلم ناس تانية كل ذنبهم انهم عرفوك ف وقت غلط وبعد ماتفوق تكره نفسك انها خدت حد بذنب حد تاني
وف النهاية محدش غيرك انت بس اللي بيضر
الحياة للأسف طبيعتها كده كل يوم تطلعلك حاجة جديدة وتديلك قلم تعلمك بيه درس جديد
فاوعي تسلم نفسك ليها أو تسمحلها انها تقضي عليك
اوعي تندم علي أخلاقك ومعاملتك للطيبة وتدي فرصة للناس دول يحولوك زيهم
اوعي تنسي ان ليك رب كريم شاهد علي كل حاجة واي حاجة بتعملها بتكون ف سبيله هو بس
انت صعب تلاقي كتير زيك لكن هما فيه كتيييير قوي منهم
انت مميز .. انت بصمتك هتفضل وعملك هتفتخر بيه قدام ربنا ، انت كريم بأخلاقك
إرسال تعليق